கலைஞருக்கு செய்யும் கைமாறு

உள்ளாட்சி மன்றங்கள், ஊராட்சி மன்றங்கள், பேரூராட்சி மன்றங்கள் ஆகியவற்றிற்கு போக வேண்டிய கேளிக்கை வரி, தமிழக அரசு திரையுலகத்திற்கு அளித்துவரும் சலுகையால் தடுக்கப்படுவதாகவும், இதனால் உள்ளூர் வளர்ச்சி பணிகள் பாதிக்கப்படுவதாகவும் அரசுக்கு தினந்தோறும் கடிதங்கள். இதனால் வரிவிலக்கு தருவதை மறு பரிசீலனை செய்ய முடிவெடுத்திருந்தார் முதல்வர்.

ஆனால், திரையுலகத்தை சேர்ந்த சங்கங்களும், தயாரிப்பாளர்களும் கேட்டுக் கொண்டதற்கிணங்க, ஏற்படும் ஐம்பது கோடி ரூபாய் இழப்பை அரசே ஏற்றுக் கொள்ளும் என்று கூறி திரையுலகத்தின் வயிற்றில் மறுபடியும் பால் வார்த்திருக்கிறார் முதல்வர் கலைஞர். இதையடுத்து மீண்டும் அவரது வரிவிலக்கு கொள்கை பலரால் விமர்சனத்திற்கு உள்ளாக்கப்படும் அபாயம் இருக்கிறது. இது போன்ற தலைப்புகளுக்கு ஏன் நமது வரிப்பணத்தை கொடுக்க வேண்டும் என்று அரசியல் நோக்கர்கள் கேள்வி எழுப்பக் கூடும்.

இயக்குனர்களுக்கும் தயாரிப்பாளர்களுக்கும் நமது வேண்டுகோள் இதுதான். எதிர்ப்புகளை மீறி வரிவிலக்கு அளித்தவருக்கு தர்மசங்கடத்தை ஏற்படுத்தாத வகையில் நல்ல தமிழ் பெயராக படங்களுக்கு சூட்டுங்கள். அதுதான் கலைஞருக்கு நாம் செய்யும் கைமாறு!